胡民祥 美國陳文成教授紀念基金會理事
水啦！會長雅斐也，接落來挺台灣大旗，舞甲誠嫣啦！
她揮出匹茲堡台灣同鄉衷心向望：傳承陳文成三大精神；
就是壯大民主政治、湠台灣民族之火、關懷社會弱勢。
佇美國各地也，台灣同鄉攏咧成立信賴台灣後援會，對匹茲堡台灣同鄉來講也，後援會有一層特別的意義；一款繼承過去，開創美好未來的深層期待。
這擺2024年大選是「台灣民族獨立」佮「台灣被併吞」的選擇；咱若「挺台灣」，咱就有才調繼續民主政治、作自由人，若無也，咱就陷落中共專制的死亡深坑。對匹茲堡台灣同鄉來講，「挺台灣」也，就是傳承陳文成精神。
佇大匹茲堡地區有一位鄉親，伊名叫科利士 (Chris)，唯郊區的李樹鄉也，出席匹茲堡地區佇6 月24的「挺台灣」後援會，伊接受會長雅斐的邀請，佇後援會作一場主題演講，以陳文成拼命推捒台灣人欲出頭天的史實，當場勉勵台灣同鄉徛出來，人人來支持賴清德也，這位上界適合的候選人。
科利士以一句台灣俗語破題：「田無溝、水無流。」
台灣總統大選，參陳文成奈有啥關係咧？當然有也！
事實上，賴清德參陳文成正正是：「田有溝、水嘛有咧流！」
「陳文成精神」就是怹兩人的「田溝」，怹兩人的「活水流！」
啊！陳文成精神是按怎形成的？
咱目睭對準1981年，台灣民主政治運行30年矣；這年5月20一位台灣人掣某仔囝也，回到祖國台灣，探親訪友、學術演講；誠不幸，伊早就被監視。6月30警總第1次約談，認定伊是「台獨欲回島內做組織工作」的大人物；佇7月初2，第2次約談，一去無回；初3透早坦倒、死佇台大校園的蕃薯園邊。這位31歳過身的人也，就是咱匹茲堡同鄉陳文成。警備總部司令汪敬熙講：「陳文成佇1979年在美國發起『美麗島』雜誌基金會，參叛亂份子許信良在美國發起『台灣民族』運動的『台獨』活動。」
警總的講法敢有合事實？咱來看，陳文成在美國經歷是啥？
佇1975年，陳文成來到密西根大學攻統計學博士學位，期間參加安娜堡台灣同鄉會，作幹事。這位數理統計學的科技人，嘛是一位文學人，伊佇鄉訊開一欄「鄉土文學版」。佇1978年，陳文成完成博士學位，應聘來匹茲堡，佇CMU統計學系作助理教授。
佇1978年秋天，陳文成參科利士等等6人成立匹茲堡台灣人權會，逐家推科利士出來選同鄉會會長，1979年科利士順利當選。人權會議決開放徛家厝，互留學生來食飯、話仙、破逗。陳文成厝就佇Oakland，離幾間大學攏近近也，學生隨時出出入入。同鄉會每禮拜六佇CMU運動埕也，分二隊拍壘球賽。1979年7月初4同鄉會去Point State Park，參加美國國慶日排擔賣點心，籌備同鄉會活動經費，陳文成嘛來鬥腳手，一直大聲喝，招人客。
1979年6月島內美麗島政團成立，陳文成發起支援美麗島雜誌。佇8月中旬，陳文成帶隊去參加中西部夏令會，佇大會呼吁成立「美麗島雜誌基金會」，得著10外個同鄉會支持。9月29美麗島雜誌的成員王淑英，來到匹茲堡陳文成徛家厝，談美麗島雜誌英文版文摘，當時王淑英拍電話互總幹事施明德，陳文成有接咧講話，科利士嘛在場。這通國際電話國民黨監聽著，列入「彩虹」極機密檔案。
陳文成期待美麗島政團發揮民主政治力量，達到有反對黨的議會民主政治。1979年12月初10，美麗島政團佇高雄遊行演講，國民黨設計高雄暴動，事後，大掠美麗島運動人士。陳文成的「議會民主政治」的熱火，拄著國民黨鎮壓「冰水」，一暝總化去。
佇12月15，同鄉會佇匹茲堡大學的Lawrence Hall辦美麗島事件座談會，會由科利士主持，陳文成嘛上台講話，喝出偃倒野蠻的政權，座談會被校園爪耙仔錄音，列入警總的「彩虹」檔案。佇12月22，美東台灣人聚集紐約市，佇聯合國廣場前舉進行美麗島事件大示威，陳文成手巾仔掩面，徛上演講台也，一張獨裁者的大頭像提高來，點火燒。有人認定，陳文成這個耍火的行動，嘛佇警總「彩虹」檔案補上一筆。
台灣獨立運動一直就有兩條路線的紛爭，一條是「議會民主政治」；另外一條是「台灣民族獨立」。經過美麗島事件的打擊，人人認定体制內民主政治有局限性，著愛有体制外的「台灣民族獨立」的戰略。
佇1981年5月20，抱定唔談政治的戒心，陳文成掣某囝轉去台灣探親。佇6月初，當年安娜堡同鄉蕭裕源請食飯，嘛有鄧家二兄弟：鄧維祥、鄧維楨，鄧維楨當時是《政治家》雜誌發行人兼總編輯。飯局變作政治論戰，鄧維楨強調「美式民主政治」的可行性，陳文成祭出「台灣民族獨立」的戰火。飯局變成一場鴻門宴，陳文成的「台灣民族之火」也，嘛傳到警總「彩虹」檔案。佇7月30，誠實就有中央日報報導：「陳君自稱回到台灣，佇談話中，發表許信良『台灣應該成立一個獨立的台灣民族』的主張。」警總約談有錄音，2019年國史館《陳文成案史料彚編》有譯文；12點鐘約談裡，一再列追問陳文成：「佇島內發展台獨組織」的任務是啥也？
台灣民族獨立誠實是陳文成的信念主張，台獨活動嘛是事實，卻是伊並無參加任何「台獨組織」。唔拘，警總掠定：「陳文成是有台獨組織任務在身，竟然無欲吐露半句。」就按呢生，被苦刑、注射、身亡。
佇1981年7月初3，尾蝶仔一枉死，蝴蝶效應瞬間爆炸，捲起台灣民主政治大風颱。連中共嘛想欲利用，北京新華社報導，中華全國台胞聯誼會會長林麗韞致電陳素貞，邀請她掣囝訪問中國，實現陳文成的遺志：「為祖國的統一拍拼。」陳素貞向「匹茲堡郵報」表示並無接著電報，同時講：「阮唔是中國人，阮是台灣人；阮翁婿無追求參中國統一，伊全力拍拼台灣民族獨立。」
陳素貞將台美人捐款，欲支持怹母囝的生活費，全數捐出來成立基金會，欲繼續推動陳文成遺志，到今已經運作40外年矣，其中有獎學金贊助學生關懷社會的種種事工，對台灣社會種種運動也，誠實是有直接佮間接的影響。
就是講也，1981 年熱⼈，陳⽂成唯海外帶 ⼀把⽕種：「台灣民族之⽕」，轉去到⽗祖之地。這把⽕種⼀路燒落來，唯 1980 年代台灣⽂學正名運動，1990 年野百合運動，接紲2008年野草莓運動， 然後2013 年洪仲丘殘殺案，社會關懷運動一串接過一串，30外冬累積落來，社會改革的力量也，來到臨界點矣，點火隨時會著的程度。誠實咧，來到 2014 年 3 ⽉ 18 暗，學⽣翻過牆，佔領⽴法院，⽕⼭爆發，太陽花⾰命；⾺英九用服貿協議包裝、欲將台灣墜落中國陷阱，這款陰謀詭計也，就完全破功矣。
科利士參陳文成共事3年，對伊的參與台灣民族解放運動也，科利士是有第一手的了解。
陳⽂成在安娜堡大學修博⼠期間，佇鄉訊設一欄「鄉⼟⽂學版」，探討作家筆下社會弱勢⼈物，嘛提筆寫散文，佇〈彷徨〉這篇裡，筆尖流出對採茶⼯⼈滿滿關懷。陳⽂成這身統計學家也，嘛是⼀位台灣⽂學⼈。
科利士追思也， ⽂成筆下的茶⼭，有熱天蟬聲聲叫天； 想著1979年熱⼈，怹兩人參加同鄉會募款，作伙咧賣台灣菜丸仔，好親像熱天蟬也，文成大聲叫，⼀直掖手，一直招呼⼈客。啊！ 凡是拄著台灣事⼯，⽂成攏未忝，全力拼命作落去。
佇遮也，咱可以掠出「陳文成精神」如下：
1. 「民主政治信念到實踐」的精神
2. 「台灣民族獨立」的精神
3. 「關懷社會弱勢」的精神
一把「台灣民族之火」將「陳文成精神」佇北美洲傳湠開來；這把「聖⽕」嘛佇島國點著矣，引領逐家踏上「台灣民族獨立」的⼤道！
今也，台灣人民面對2024總統大選的考驗，4位總統候選人也，誰是可信賴的？
誰會繼續台灣民主政治路線，嘛舉著「台灣民族之火」前進。面對中共欲併吞台灣，怹彼款「留島不留人」的野狼，欲將「台灣民族」拆食落去怹「中華民族」的腹肚；咱台灣人著愛覺醒、著愛掌握著家己命運，完成「台灣民族獨立」的正常國家！
賴清德礦工之子，苦學成作醫師，發覺醫師工課每擺醫好一個患者爾爾；政治工作若認真作，每擺可以為一大蓬人揣著幸福，所以也，伊行入民主政治工作者這條路。佇1994年，擔任陳定南省長競選總部「全國醫師後援會」會長、紲咧怍國民大會代表、立委、台南市長、行政院長、副總統、民進黨主席。
賴清德關懷社會嘛隨時表現佇日常生活裡，親像佇2004年伊作立委時，看著少年人逆向開車，恐驚會造成交通事故，傷著無辜；好意勸怹莫按呢，結局被3位少年人提棒球棍仔圍咧拍，目睭角膜裂開、輕微腦震盪，滯病院12工，伊事後採取原諒彼3位少年。伊堅持作「著的」代誌，親像坐上民進黨主席位置，全力掃除黨內烏金，堅守性平權，對黨工遭受性騒擾，一旦呈報 #MeToo案件，馬上公正處理。佇執行政治工作的同時，賴清德嘛不時會扮演醫師角色，路頂拄著傷患，絶對馬上救助。賴清德的社會關懷佮勇氣也，誠實值得肯定呵咾。
佇民主政治路頂實踐欲30年，一路行來也，賴清德的特質有：1. 優秀的民主政治實踐者 ，2. 堅定的台灣民族獨立運動者、3. 有魂力的社會關懷執行者。
事實上，2014年6月初6台南市長賴清德踏腳到中國上海，初 7佇復旦大學進行座談會；針對民進黨台獨黨綱，中國學者提出質疑，賴清德脫稿講出：「台獨是台灣社會共識。」同時，賴清德紲咧比評2014年3月18台灣太陽花學運佮中國1989年六四天安門學運，攏是愛國運動，應該包容、反省、和解。
佇2020年7月初2，陳文成過身39週年追思會裡，賴清德致詞，摘出陳文成二句話：「我支持民主，我一直希望台灣進步。」這二句話來自警總約談時，陳文成回答鄒小韓上校質問的答詞。
鄒問：「你作為國民黨員，盡了什麼義務？」陳答：「我支持民主。」
鄒問：「你在海外這幾年，為台灣做了什麼？」陳答：「我一直希望台灣進步。」
賴清德講：「二句話深在我心，送互在場少年朋友，希望按呢作伙守護台灣。」賴清德佫強調：「中共併吞台灣的動作愈來愈嚴重，民主政治運作著愛加深維護台灣國家主權。」
賴清德以上的話語也，有繼承「陳文成精神」的意涵佇咧。
賴清德踏著台灣民主政治的大道前進，接力舉起陳文成這把「台灣民族之火」，誠是一位務實的台獨工作者，勇敢反擊中國文攻武嚇，維護台灣民族國家主權獨立。
賴清德是唯一可信賴的候選人，選伊作台灣總統，是台灣人民有幸也，是天佑台灣。
多謝！祝逐家康健！平安！
科利士一講煞，雅斐召集人隨送一領「挺台灣」的襯衫，科利士馬上穿上身，參召集人及聯絡人3身翕一張紀念照。
後援會結束矣，回到李樹鄉徛家厝，收著聯絡人傳來3人合照，伊將照片佮演講詞傳互好朋友。
好朋友來Line上對談，筆寫一來一往，怹達成以下的看法。
就所有的資訊來看，其他3位候選人，根本就無台灣民族觀；怹攏是傾向中國的，程度深淺有所變化爾爾。
柯文哲是兩岸一家親，攻擊伊的國內對手，一支嘴亂亂泉，隨意講幹話、屁話，一再失言，卻是對中國唔捌有過失言半句。柯文哲嘛講過：「中共希望伊出來選總統。」就是作中共的特首啦。
若是，侯友宜這位國民黨的總統候選人，講伊支持符合中華民國憲法的九二共識，基本得是馬英九式的傾中路線。侯友宜腹肚無貨，凡事出嘴只會一句：「好好做代誌」，根本無做總統能力，嘛無總統格也。
最後，郭台銘這位企業家也，伊捌講：「民主不能當飯吃。」卻是伊即馬欲來參加競選總統的民主政治。所推銷的競選宣言是：兩岸和平協議；伊強調欲佇「一中各表、九二共識」基礎上，來落實兩岸和平宣言。1951年西藏參中共簽和平協議，結局佇1959年被中共拆食落腹。所以，3位傾向中國，行中國路線的候選人也，咱就免談矣。
科利士友人對陳文成三大精神當然肯定，誠實有掠著陳文成的貢献，問題是賴清德敢誠實攏有繼承落來三大精神；雖罔伊比其他候選人攏好幾偌倍，但是有關台灣終極目標：「台灣民族獨立」，就是陳文成三大精神之一的「台灣民族之火」，賴清德敢真正有膽量百分之百承擔落來也？
科利士友人這時拄好咧款待2位金孫來到賓西渡假，孫仔由查某囝及囝婿掣來，6月19來到。本誠厝裡只有伊佮牽手2人爾爾，這時也，增加4位，厝裡變甲閙熱滾滾。孫一位9歳，一位4歳，4歳的厝內參阿公走相逐、宓孤揣。牽手無閒煮食，科利士友人食飽負責洗碗，日時是誠無閒。友人揣暗時9點以後，佇手機頂的Line裡，參科利士賴來賴去。
科利士友人寫來：「政治是一款專業，每人運作方式無共款。」
科利士問：「怎講呢？」
「政治有人講是：一款高明的騙術。」
「是啊，朱高正就是按呢講也，伊由哲學家康德遐販來的。」
「對政客來講，怹真實是咧耍政治騙術；唔拘政治家唔是按呢生。」
「舉例看覓咧。」
「李登輝的政治運作千變萬化，有時是運用魔幻術。」
「騙術佮魔幻術敢唔是共款？」
「政客為著私利，耍騙術；政治家為民造福，創造魔幻術，好比諸葛亮耍空城計詐術，解除敵人攻城。」
「李登輝佇啥代誌耍著魔幻術？」
「1988年拄接位中華民國總統，國民黨黨國人士人人金金相李登輝，不信任伊！」
「是也。」
「佇1990年10月初7，伊成立『國家統一委員會』、1991年2月23通過『國家統一綱領』、一國兩府、建立新中原。」
「意思是繼續三民主義統一中國的國民黨政策，敢是按呢？」
「是也，一款交心，宣示無支持台灣獨立。」
1988年李登輝繼承總統大位，已經有1986年成立的民進黨，國民黨參民進黨形成「統一」佮「獨立」的對抗，1990年有野百合學運，李登輝善用民意，答應解散萬年國會：佇1991年5月初1，廢除「動員戡亂時期臨時條款」，結束國共內戰狀態；廢止這款條文，終止勘亂体制，宣示台灣參中國不再是佇一款內戰狀態，台灣是台灣，中國是中國；當年佇中國各省所選出來的國民大會代表，立法院委員，自然不再有法理支持怹的萬年身分也。所致也，紲咧佇1992年，國會全面改選。
後來，1996年，李登輝推出台灣總統直接由台灣人民來選的決定，落實民主政治的原則。佇1999年7月初9，接受「德國之聲」專訪，李登輝祭出：「兩國論」，將台灣參中國正式拆開來。
李登輝總統「兩國論」，頭一擺將台灣佮中國定位作：「國家佮國家的關係，至少嘛是特殊的國對國的關係（Special state to state relationship）」。雖罔中國激烈反對，美國無支持，李登輝向美國特使卜睿哲表示：「阮的目標猶是一個中國，阮嘛全然反對台獨。」但是，當年的民調顯示：「有70%民眾贊成『兩國論』，90%反對中國所提的『一國兩制』。」
李登輝這盤「國統會」魔幻術，好比是台灣民間傳說的魔神仔，施展威力來也，將黨國人士的疑心攏安貼甲足四適矣，人人攏滿意，隨在李仙發威。
科利士想起來矣，當時台獨運動者人人罵李登輝，頭殼歹去矣，啥物碗糕咧，猶咧國家統一咧，猶咧建立新中原咧。中原就是中國華北高原，中國心臟地帶也。
李登輝嘛派出秘密使者，出訪中國談判，將江澤民耍甲服服貼貼。
其實也，科利士友人嘛罵過李登輝的「國統會」，寫過社論〈不可寄望李登輝〉。
有人按呢看李登輝：「伊佇台灣佮中國之間不時咧天人交戰。」
只是無人料著伊實質上宣布「台灣獨立」，雖罔猶無法理「台獨」地位，嘛無得著國際承認。
國民黨人士相信伊李登輝也，一心猶有欲統一。事實上，後來的發展是按呢生也，「國統會」是魔幻術，耍國民黨、嘛耍民進黨；「國統會」竟然是也，伊推捒台灣民主政治的障眼法。
2000年陳水扁黨選總統，拄上任也，為著貼民心，宣布無欲廢止「國統會」、「國統綱領」，後來，佇2006年才宣告廢止。
李登輝的「魔幻術」來自伊的哲學觀：「我是『唔是我』的我」，這款哲學是伊一生為「公」利益，實踐行踏的原則。伊一生身分自我否定再否定，伊也，日本人、台共、國民黨人、台獨人、台灣人，一路演變過來，就是一再自我否定、反省、重建自我的過程。宇宙、世間事事務務本就是一款互相「矛盾、對立、轉化」的「統一体」，為著統一体的福祉，運行權謀數術來達成，就是李登輝的「魔幻術」。當年，為著「台灣人民」這個「統一体」的「公眾」福祉，伊施展「國統綱領」魔幻術，將台灣由威權專制過渡到民主自由政治。1990年任用郝柏村當行政院長，為著避免軍人干政，李登輝要求郝柏村提前除役，放棄一級上將終身榮譽，郝柏村以文人的身分出任閣揆；李登輝一招古代「出將入相」的權位轉移魔幻術，正式解除軍頭郝柏村的兵權。
科利士友人參伊咧賴來賴去時，事實上，友人是咧渡假中，地點是馬里蘭州的大洋城。友人查某囝掣囝婿倽個查甫孫由加州矽谷，轉來賓西她的出生地，參爸母重溫囝仔時代故鄉的滋味，建立祖孫的親情，期間作伙來到大洋期渡假，唯7月初8至15。
期間，科利士友人家己一身人也，特別去私人碼頭釣魚，入場費10美金，釣竿租金一支10美金，1打冷凍蝦6.5美金。徛佇碼頭，唯中晝釣到日頭落海，長長有7點外鐘，重溫70年代佇核羅里達海釣的滋味，46年前的海釣鹹份氣氛佇鼻孔裡湠開來，嘛佇記持裡浮起來「天霸海灣」海天一色景緻。彼工是7月12，成績是2尾魚，2隻蟳，佫有空中逃生幾尾魚、幾隻蟳。最後一幕也，是無上鈎的紅火球，一粒欲落大西洋西緣的、數十英里長鯤鯓內海的日頭；誠佳哉，火球隨佇太洋美西緣的美麗島嶼東海岸，成作「玉里日」浮出太平洋。這幕日落景存佇手機的鏡頭裡，有參向時安平鯤鯓東爿台江內海、當今府城的金作家古都良友分享。
窮實也，釣魚者嘛是敖一步騙術，用蝦穿入魚鈎，晟魚來食餌，餌是騙，鈎是術。科利士細漢時，將肚蚓幾尾用絲線縳作一丸，絲線一頭結交佇竹竿，佇水溝邊的草埔裡，竹竿上下來回垂跳，四腳仔上愛食肚蚓，大嘴一開，一丸肚蚓吞欲落喉矣。這時也，正手竹竿抽懸來，倒手麵粉袋伸到竹竿正下腳，拄好是四腳仔著驚回神時，吐出入口的美糧，緊欲逃生，結局是落入麵粉袋裡去矣。
科利士友人海釣、抑是吊四腳仔也，攏好親像政客耍騙術，唔是足高尚；窮實也，無法度比評李登輝的政治魔幻術，伊彼款政治家的大範心態，出發點是台灣人公益。
上界反對共產黨政權的美國總統尼克松，煞佇1971年飛到北京，參毛澤東相見歡，美國聯合中國，來對抗蘇聯，紲咧卡特總統佇1979年參台灣斷交，承認中華人民共和國。後來也，蘇聯共產帝國佇1991年崩山，加盟共和國一身一身攏脫離，紛紛成作獨立的共和國，行入民主國家禦列。美國中國你好我好，長長46年，來到2017年，美國總統川普為著維持美國作世界老大，參中共拆破面。2021年就任的拜登加速對抗中共，為著守護世界老大地位，聯合世界各民主政治國家，作伙對抗共產中國專制獨裁政治。這擺台灣總統大選也，就是選民主陣營抑是獨裁陣營。
佇大洋城渡假，遐是藍蟳盛產的所在，特別是附近的徐莎匹海灣的藍蟳，一等的品質。科利士友人當然嘛入鄉隨俗，大食藍蟳來矣。當然，先來一個笑話開脾，美國西部洛磯山脈地區的人，怹遐當然無海產，無蚵，卻是興食蚵，所以就地取材，創出一道「洛磯山蚵，Rocky Mountain Oysters」，這款是山產牛膦核、羊膦核。其實也，台灣莊腳嘛有這款山產；豬仔囝閹過矣，就會緊肥大，科利士友人細漢時代捌食著小隻豬蚵，彼是伊阿公閹細隻豬的膦核也，所煮的美食。
洛磯山脈來的人也，來到大洋城，當然食藍蟳也。
佇餐館，服務生捧來一打怹定的藍蟳大餐。
洛磯山客一看，講：「阮是定藍蟳咧。」
「是啊！這就是恁定的藍蟳大餐一打也。」
「你看也！逐隻攏是紅貢貢，唔是藍色的咧！」
「恁敢捌食過龍蝦？」
「捌矣！」
「啊，恁食著龍蝦是啥款色緻？」
「紅色的也。」
「煮熟的龍蝦，蟳也，攏是成紅貢貢的色緻。」
「喔！？」
藍蟳、紅蟳；生蟳、熟蟳；啥物叫作蟳？
民主政治、專制政治；政客、政治家；啥物叫作政治？
政客橫行那蟳咧！政治家心肝正直！
橫行者就摠來也，拆食落腹，上好也！
科利士友人就佇大洋城揣著兩間蟳料理名店：Crab Alley Restaurant佮Higgins Crab House，全家大人囝仔7口灶也，藍蟳食甲歡歡喜喜。
蟳的一生值得探討，食蟳捌一寡蟳的世界，嘛有所啟示吧？
科利士友人食藍蟳也，順煞一探徐莎匹海灣藍蟳的生命史。
徐莎匹海灣由北爿的趖士奎哈那河口算起，趖士奎哈那河是賓州第一大河，水源有兩頭，北爿這頭是來自紐約州中南部的溪溝，西爿發源佇賓州中西部的阿里藝尼山脈，兩條水源佇賓州中部的諾杉保蘭 (Northumberland) 滙合，然後往南流過州都哈里士堡，紲咧一路流入馬里蘭州的徐莎匹海彎。徐莎匹海灣唯趖士奎哈那河口算起，延伸至南爿出海口，南北長條形海灣有200英里長，東西濶有窄至2.5英里，嘛有濶到30英里；大部份屬於馬里蘭州，南爿海域屬於冒芝尼亞州。科利士57年前也，就踏腳到西爿趖士奎哈那河的河墘，佇諾杉保蘭北爿的呂意堡的巴克乃奧大學讀碩士，大學北爿30英里的威廉波特城就是世界少棒的總部，就佇趖士奎哈那河的南岸。科利士也，就佇1970年代，親身見證過〈威廉波特風雲〉，彼時「台獨」空軍佇棒球場空中飛來飛去。今年2023台灣桃園的少棒隊代表亞太區來比賽，科利士參怹會長雅斐作伙也，一批匹茲堡同鄉佇8月17去威廉波特場球鼓勵小將，送怹每人一粒匹茲堡海盜隊的棒球作紀念。
總是也，徐莎匹海灣藍蟳敢知趖士奎哈那河源頭的風雲？
科利士友人的〈藍蟳生長傳奇〉，就以徐莎匹海灣藍蟳講起。
蟳傳宗接代是另類傳奇，公蟳母蟳交配期是5月至10月，鹹度低的海灣裡，親像徐莎匹海灣。佇處女蟳最後一擺拄欲褪殼的時陣也，公蟳就將處女蟳攬抱稠稠，佇褪殼至換出新殼的前後幾工裡，一路雙人行動。當然處女蟳褪殼時公蟳放開攬抱，佇邊仔照顧。褪殼之後也，處女蟳翻身坦笑，腹肚展開開，公蟳將滿滿精蟲鋪佇處女蟳腹肚。雖罔只交配一擺爾爾，母蟳會多次生卵； 公蟳一擺射入來的精蟲由母蟳收存佇咧，隨時備便作新產卵的受精之用。交配煞矣，公蟳佫馬上將母蟳攬稠稠，一直到母蟳新殼碇矣，才放開來。
紲咧，母蟳徙往鹹度卡高的海灣偎大海的所在，準備產卵受精，期間是交配後的2到9月日內；通常春天交配會佇熱天尾產卵，秋天交配可能等到隔年春天尾產卵。哇喔！蟳公精蟲等待2至9月日後的母蟳卵，公蟳的精蟲定著是誠勇健可以保存彼呢久長，查甫人精蟲大概無這款本事吧。
卵一受過精，就佇母蟳肚外口發育出一堆海綿款的卵團，總共有75萬至800萬受精的卵，偌濟就憑看母蟳的大小。這時的母蟳號稱海綿蟳，卵佇海綿形成後約2禮拜孵出幼蟳，佇卵裡發育，海綿開始變色，唯柑色變作棕色，最後成作烏色。幼蟳紲咧佇水中漂流，每隻幼幼小小只有頭毛大細的程度，因為季節性風吹，加上海底層水循環模式，這款幼蟳大多數就漂向大洋去，然後才回到產卵區的海草床所在定居。就是先去海洋裡鍛鍊一段時日，然後也，回到海灣水草區裡，有通食飽的所在過日子。
回到海灣抑是近海的區域，幼蟳其實並無成年蟳的形樣，窮實算是一款幼蟲爾爾，著愛經過6至7次褪皮以後，才轉化大眼幼体，這時就有成人蟳款樣的一排爪矣，可以佇水底泅水、跁來跁去。
最後，大眼幼体化身出蟳的第一階段，這款幼蟳就足有成人蟳的模樣矣，不而過大小只有5 分之1 英寸爾爾。幼蟳漸漸發展出行動機能，就開始唯海灣口的高鹽度水域也，徙往鹽度比較卡低的區域。冬天來到，這寡幼蟳甚至來到上界北爿的趖士奎哈那河裡，一路足足超過200英里的旅程。
成年公蟳、猶未成熟的處女蟳留佇海灣佮溪溝的鹹水地域，秋季來溫度降低，就徙去到淺草床、路糊糜瀾土底、抑是海灣中部水深的地帶。冬天來到時陣，大多數蟳就宓佇河流岸邊的瀾土，抑是海灣淺草床的軟土裡。母蟳興鹽度高的水域，所以冬天就徙到海灣靠海洋的所在，公蟳意愛鹽度卡低的所在，所以就徙到海灣偎趖士奎那河的河口，宓佇卡深的水域過冬天。唯12月到3月，蟳差不多無生長，只有溫度開始升高時，蟳就愈來愈活跳，揣食嘛揣對象交配，為傳宗接代扮演怹的角色矣。
藍蟳盡怹傳宗接代的身世，數千外名的馬里蘭州佮冒芝尼亞州的討海人也，就歡喜扮演怹掠蟳的工夫，供應廣大的蟳市場，大部分是餐廳吧，特別是熱天的海濱遊客到的餐廳。
科利士友人的〈藍蟳生長傳奇〉也，結尾篇如下。
徐莎匹海灣盛產藍蟳，7月正是蟳肥，大洋城靠近徐莎匹海灣，藍蟳當然供應無欠缺也。蟳約有3年生命期，長大著是靠換殼，一生大概换20捅擺殼。拄換殼的12點鐘內，新殼猶足軟，掠著可以歸隻食，免費工剥殼食，誠合美國人氣口。
美國人食蟳歹落手，所以，餐廰有提供軟殼蟳，歸隻食；軟殼是蟳拄換殼猶未硬的時陣，美國人講軟殼蟳滋味清津，可烘烤、炒、油炸、煎。科利士友人想也，軟蟳肉質大概是鬆軟，應該無碇殼蟳的肉質之美吧，應該是美國人未曉食蟳的另類選擇吧。軟殼蟹經過清洗、單獨包裝、冷凍處理好勢，全年攏可以訂購。另外美國人誠愛作蟳餅料理，小塊蟳球搵醬汁可用來作開脾菜，大塊可以用來作三明治。
科利士收著友人傳來〈藍蟳生長傳奇〉文。
科利士一看，隨送出一逝字：「啊！藍蟳換殼是危機處處也。」
友人回：「是也，親像處女蟳欲換殼，公蟳將她摸牢牢保護；受精後，猶佫抱恆恆，到母蟳殼碇矣，才放手喔。」
「傳宗接代無容易也。」
「咱台灣也，2024總統大選，嘛好親像是藍蟳咧換殼，危機處處也。」
「 台灣四百年來，嘛那像藍蟳一再換殼，佇新殼猶未碇的最軟弱時刻，就被外來強權拆食落腹。」
「是也，上近的一擺就是1945年，民間講是：『狗去猪來』，咱煞互蔣介石這隻大龜精吞落去。」
「這擺總統大選，咱若選唔著人，就會夆中共同路人摠去，親像軟殼藍蟳變作中共的美食。」
「賴清德是4位候選人裡，上適當的人選，才未變成中共的餐中美食也。」
「卻是有寡選民欲下架民進黨也，所緻無愛投賴清德。」
「這款下架民進黨的選民也，大部分是所謂非綠的選民，所謂的藍佮白人士。」
「不而過，嘛有深綠人士不滿民進黨，特別是討厭新潮流派。」
講著「新潮流」這個民進黨的派系也，科利士友人佇2007年寫過諷刺新潮流的短詩；彼時伊車厄後第5月日，猶咧康復中，無去上班，關佇厝裡療養、作復健運動，日子躼躼長。伊的開刀醫師Ivan Tarkin，參伊是水牛城大學的前後期校友；只是科利士友人提著博士學位時，Dr. Tarkin 猶未出世咧。科利士友人是倒爿大腿骨裂甲碎糊糊，醫師是透暝開刀，隔早伊掣醫療團隊來巡病房，友人向開刀醫說謝。紲咧，醫師向伊的團隊半耍笑開講。
「東方亞洲人足有禮貌，你也，加伊刣，伊猶咧向你說謝咧。」
友人佮醫療團隊也，逐家攏哈哈大笑，氣氛變甲成輕鬆。紲咧，開刀醫Tarkin佇壁頂的白枋，提烏色筆畫出大腿骨碎裂的大約情形；伊按怎用不銹鋼作支架，順著鋼枋的圓孔，每孔穿一支螺絲，鑽入大腿骨來固定、支撐開刀後猶未癒合的大腿裂傷。
復健療癒長長10月日，踞佇厝裡，科利士友人寫三行詩作心靈療傷，想著啥就寫啥也，親像下面幾首：
〈芎蕉〉：無論是青芷 / 抑是熟黃 / 心地一生純白。
〈竹〉：本是草類出身 / 參稻仔可論兄弟 / 鋼柔身段彎伸自在。
〈杜鵑〉：雖罔唔是鳥隻 / 花語悅目滿山笑 / 血滴傷心滿溪流。
〈鹿〉：阮家園本底是樹林及草埔 / 二腳猿煞入來起厝整花園種菜 / 阮主人來收租食菜哺金針花。
〈人類〉：類似离獸 / 怹的邊界薄那紙 / 濟濟人隨意穿行兩爿。
〈台灣〉：歐亞太平洋枋疼生天頂玉 / 生態品類珍自古本有種 / 文化亦款款獨步世界典範。
〈三腳仔〉：台灣寶島珍品生物誠是濟 / 陸封高山鮭魚是第一奇 / 猶輸古今種種三腳仔家神。
〈老芋仔〉：南島檳榔族美糧本底道有芋 / 親像檳榔心芋雙冬芋麫芋 / 新種老芋仔在地化芋仔蕃薯。
佇2007年2月初2，寫一首〈新潮流〉，詩文如下：
三代猶未過好額死了了，
二代猶未去理論就漚舊，
一代猶未了新潮流臭香。
民進黨內的新潮流派系也，來自黨外時代的、1984年創刊的《新潮流雜誌社》班底：編輯、採訪、寫稿人等等，怹的路線是「中間偏左」。黨外時期的新潮流是進步的，怹關懷勞動階層、社會運動種種團体，嘛進一步參怹聯合，對政府的政策發揮影响力。新潮流嘛將即段經驗轉化作「群眾路線」，靠即款体制外的力道也，對公職身分的政治人物形成領導影响力；佇1986件，民進黨成立矣，新潮流嘛結合「台獨勢力」，推動民進黨佇1991年制定「台獨黨網」，主張透過「公民投票」實現「台灣獨立」的理念。後來，佇1999年通過《台灣前途決議文》，主張「台灣已經獨立」，國號無一定叫作「台灣共和國」；當前叫作「中華民國」，需要時，將來再改國號。這是為著陳水扁2000年欲參加總統大選鋪路，大選時避開「台獨議題」的論戰，想欲爭取中間選民的一款策略。深綠台獨運動學者徐正鋒批評，決議文實質上將「台獨運動」矮化到「正名制憲」的運動。
來到2000年取著中央執政權，才14歳的黨齡爾爾，新潮流就爛甲食銅食鐵矣，國營事業佔滿滿，核心份子嘛西進去經商大發財。2016年民進黨重新掌握中央執政權，新潮流頭人又出現佇權力核心。
對以上台獨立場的修改，科利士友人看法是：新潮流放棄体制外的「群眾革命」路線，行入体制內的議會民主政治路線也。這款撤退也，事實上就是偏離陳文成「台灣民族之火」的精神矣。遷黨回台灣的「台獨聯盟」這個革命組織嘛唯体制外融入体制內的民主議會運作；嘛是因為按呢生，深綠學者徐正鋒退出台灣獨立聯盟。
關於國號也，科利士友人表示如下：
孔子講：「名不正，則言不順；言不順，則事不成。」白話來講：「名稱若是無正當，就無法講甲誠合理；話講來若無順，就理不足，氣勢弱矣，做來就歹成功也，死佇半路矣。」
中華民國、抑是「中華民國台灣」，比起正式名稱：「台灣共和國」，是有一大段距離，「中華民國台灣」名不正！國際上歹得著人接納也。
現階段「淺綠」猶咧「維持現狀」，欲達到「深綠」純正的「台灣共和國」，猶有一大里路也。台灣民主先生李登輝行到「兩國論」，經過「國統會」魔幻術；賴清德敢有類似的魔幻本事？將台灣人民渡到「台灣共和國」的境地！
誠趣味也，將賴清德掠來比較李登輝，推想賴神敢有李仙彼款魔幻術也？
就地緣來講，賴清德參李登輝攏是新北市人，李登輝故居佇三芝，賴清德故鄉萬里就佇三芝隔壁。多次見面，李登輝攏親切接待，分享人生哲學；政治之道就是謙虛、冷靜和忍耐，掌有權力著愛保持道德高尚。
佇1996年，賴清德担任「國大代表」期間也，就參李登輝總統有過交通互動。赖清德担任立委以後，佮李登輝互動燒烙，後來嘛不時去「翠山莊」，請教李登輝。
賴清德佇2017年8月初8接任行院長，隔日李登輝就佇「李登輝基金會」募款餐會致詞時，呵咾賴清德，講伊年輕又有魄力；相當堅持台灣主權獨立。講煞，嘛紅酒一杯提起來，請逐家為著賴清德協助蔡英文執政加油，然後一杯紅酒啉焦，誠實看重賴清德。賴清德隨佇2017年9月24去拜會李登輝，相談一點外鐘，李登輝呵咾伊台南市長有好政績，是一位孝子；李登輝鼓勵伊進一步憲政改革。佇2023年7月30，賴清德佇李登輝過身3週年發表「摯愛台灣，有所作為」，自我強調「繼承李登輝精神，佇民主自由路頂，為台灣人民也，開創民主和平。」無再提起尊李登輝是「台灣國父」的相關言論。
即馬為著競選總統，賴清德為著爭取年輕佮中間選票，嘛掛慮「務實台獨者」身分會引來美國不滿，另外，避免陷入反對陣營所設定的「台獨等於戰爭」的局面；開始轉移至推動台灣民主政治的中立形象，針對兩岸主打「和平保台」講法。
佇7月27，賴清德在總統府接受彭博商業周刊專訪，專訪文佇8月15刊登，拄好是賴清德過境紐約、然後飛到巴拉圭訪問時；專訪文針對有關「台灣正式獨立」的主張，賴清德回答如下：
1. 現此時：台灣是名叫「中華民國」的主權獨立國家，
2. 無必要正式宣布獨立，
3. 無台灣獨立路徑，
4. 未改變國號，
誠拄好，就在8月20，科利士友人收著翁泰德也，伊的一則圖文〈成人之美座右銘〉；圖是賴清德彎腰鞠躬也，向在座總統致敬的影像，書文如下：
總統文膽姚人多：「台獨無市場。」
賴清德：「10年之癢，我是姚人多2.0，『台獨無路徑』也。」
科利士友人熟悉的翁泰德是一位化學家，化學家興趣多多，研究台灣話語音，佫是一名木雕家，專門雕刻人面，科利士友人稱伊是台美第一刀；佇10外年前，友人有收著台美第一刀送的〈燈下夜讀雕像〉一幅，就吊佇友人讀冊間的壁頂。
科利士佮伊的友人一路談落來，談到新潮流的成長過程，深綠有寡人對新潮流不滿。啊，賴清德是新潮流的一份子，連帶嘛受著影响矣。人講：「近朱者赤，近墨者黑」，賴清德敢嘛是共款咧？俗語嘛咧講：「耦出污泥而不染」。啊，賴清德敢是新潮流裡的蓮耦咧？科利士友人比較卡關心的是台灣民族獨立，就是科利士所點著陳文成三大精神中的「台灣民族之火」，賴清德佇台灣民族立場頂，愈偎總統大選，煞愈勼縮。
友人講：「賴清德的台獨立場也，恐驚無到陳文成『台灣民族之火』的熱度矣。」
科利士回：「其他候選人攏是傾中的政客，至少賴清德猶徛穩台灣主權獨立。」
台美人各地紛紛成立後援會支持，濟濟深綠台僑大力支持，親像賴清德8月12過境紐約，8月16過境舊金山，兩城市的僑宴台美人熱烈出來捧場：佇紐約有蘇春槐僑領—半導体女王，超微 (AMD) 蘇姿丰執行長的老爸，佇舊金山有醫師林榮松大僑領，怹攏是肯定賴清德的深綠代表人物。科利士的匹茲堡鄉親也，嘛有一位出現佇舊金山，參駐美大使蕭美琴作伙登機，歡迎賴清德到舊金山；這位鄉友是「美國在台協會(AIT)」主席Laura Rosenberger，她肯定賴清德是穩健、理性的政治工作者。
過境紐約時，留落來一張值得注意的背影，佇8月13，紐約的花旗球場，大都會棒球隊的主場，穿印I號的大都會隊球衫的賴清德徛佇倒爿，蕭美琴穿II號球衫徛正爿，面對球場，夆一款搭檔競選的聯想。担任過AIT主任的楊甦棣呵咾：蕭美琴佇華盛頓的外交工作表現優越，一旦入選，將來是重要的領導階層的優秀人物。其實也，這擺觀球賽的觀眾席裡，另外有一張排排坐的影像：唯倒爿到正爿分別是：蘇姿丰老爸蘇春槐、賴清德、蕭美琴、林佳龍，夆多多的想像空間也。
台獨聯盟的陳長山佮羅重義怹兩位絶對是深綠，陳長山對羅重義按呢講過：「唔通看賴清德古意古意，叫是伊容易妥協、受人操控；一旦伊掌握權位，伊是相當堅持家己意志的人。」羅重義一再呵咾東歐各民族國家，怹的共產黨出身領導人物，攏佇關鍵時刻奮力一搏，英勇引領人民脫離崩山中的蘇聯帝國，行上民主政治，達到「法理獨立」的主權國家。
回顧1988年以來，歷任台灣總統的政治遺產如下：
1. 李登輝是「兩國論」護台灣，
2. 陳水扁是「一爿一國」保台灣，
3. 馬英九是「化獨漸統」賣台灣，
4. 蔡英文是「維持現狀」守台灣。
36年過去矣，超過一世代的歳月，咱向望後任台灣總統留落來啥款政治遺產？敢唔是有「法理台獨」的台灣共和國？
窮實也，科利士友人對賴清德咧作嚴格檢驗，絶對唔是操煩過頭！賴清德也，敢唔是有學著新北鄉賢李登輝的哲學觀矣？彼款「我是唔是我的我。」
到底也，「無台獨路徑、未改國號」，敢是一款魔幻術？
類似李登輝「國統綱領」，敢是也？
陳文成「台灣民族之火」熱度也，敢會得著百分之百傳湠？
寫佇茉里鄉，2023-8-25