胡民祥 美國陳文成教授紀念基金會理事
主持人、董事長陳寶月二姊、洪三雄董事、各位得獎人、各位貴賓，逐家敖早。
我是美國「陳文成教授紀念基金會」的理事，足歡喜來觀禮，首先，向所有「社會關懷」得獎人，致上萬分的敬意、大大的恭喜。
參陳文成教授，共事三年；1978 年秋天，阮有六個人成立匹茲堡台灣人權會，推捒同鄉會運作。1979 年黨外人士創辦《美麗島雜誌》，陳文成呼籲捐款，得著各地同鄉會的支持，每月日贊助美金 5000 箍。
1981 年 5 月 20，文成轉來台灣；6 月初，我去日本神戶出差，臨時去辦簽證，怹講：「阮電腦有你的資料，無法度互你簽證。」我只好鼻仔摸摸咧。唔拘，千想、萬想， 嘛無想著⼀月日後，傳來：「文成死佇台大校園裡」。文成第⼀擺被約談，聽講有放錄音帶互伊聽，包括 1979 年 12 月 15 暗，阮匹茲堡台灣同鄉會主辦的美麗島事件座談會，會是我主持的，文成當然有發言；另外，是⼀擺唯文成厝裡拍的國際電話，談《美麗島雜誌》 欲出英文文摘的事工，我嘛在場。
啊！夭壽的校園爪耙仔。
陳文成修碩士、博士期間，發行刊物，討論 1970 年代台灣鄉土文學的意義。伊關懷作家筆下的社會弱勢⼈物；伊佇〈彷徨〉這篇散文裡，對採茶工人充滿同情。窮實也，統計學家的陳文成，佫是⼀位台灣文學人；機械工程出身的我，嘛是⼀位文學⼈，2015 年出版台語小說集：《相思蟬》。
來觀禮，想著文成筆下，茶山裡，熱天蟬仔的叫聲。佇 1979年熱人，阮為同鄉會募款，賣台灣菜丸仔，文成那像熱人的蟬，一直叫，一直叫，一直叫，叫人客來買菜丸仔。 憑若為著台灣的事工，文成攏那像蟬叫天，攏未忝。啊！文成是一隻互我不時咧懷念相思的蟬。
1979 年國民黨政權設計美麗島事件，大掠黨外人士判刑落監。陳文成的民主政治熱情之火，互國民黨政權「鎮壓冰水」，一夜之間拍冷去，誠受氣，嘛有夠鬱卒。冷靜討論，總結：体制內的改革，親像民主政治選舉運動，著愛同時進行体制外的抗爭；兩條路線的戰略指導原則道是：「台灣民族主義、台灣民族解放、建立台灣民族國家。」
懷思文成，我寫詩、散文、小說，主題攏是火種；1981 年熱人，陳文成唯海外帶一把火種：「台灣民族之火」，轉來到台灣父祖之地。
這把火種⼀路燒落來。
窮實也，唯 1980 年代的台灣文學正名運動，1990 年的野百合運動，來到 2008年野草莓運動， 2013 年洪仲丘殘殺案，一大串的社會關懷運動累積落來。來到 2014 年 3 月 18 暗，一夜之間，量變衝到質變，体制內衝向体制外，改革變革命；佇長年抗爭的蔡丁貴教授公投盟協助下，學生成功翻過牆仔，非法佔領立法院；火山爆發，太陽花革命，成功阻擋：馬英九政權出賣台灣的陰謀、陽謀、詭計。
送恁⼀本：《相思蟬》台語小說集，這是咧書寫陳文成教授、參伊同時代的台灣留學生，佇北美洲奮鬥拍拼、有血有目屎、台灣民族火種的故事。每本攏有我的簽名、落印、 參一對賀聯，按呢寫：「台灣民主政治有幸有文成，社會關懷運動有影有繼承。」有影， 陳文成的精神、傳湠到逐家的身軀頂矣。
咱作陣來，將台灣民族之火燃互炎炎炎，完成咱台灣民族解放的大夢！
胡民祥佇美國「陳文成教授紀念基金會」的「社會關懷獎學金」頒獎典禮致詞
2016-11-5，地點：「陳文成博士紀念基金會」，台北